زراعة الطماطم

الطماطم فيه برشة أنواع الي تنجم تزرعهم, ويتسمى من أهم الغراسات في تونس. يستحق شوية لهوة أما بالأساس ماهواش صعيب.

الطاطم هي نبتة تحب تعيش في أرض غنية بالدبال وغنية بالعناصر الغذائية وخاصة أرض تربتها تسخن بسرعة.

الطماطم يعتبر من الغراسات الأكولة الي تستحق برشة سماد (قبل ما تغرس الطماطم، وقت ما تغرس، وعلى طول فترة الغراسة)

وقت الغراسة الطماطم يستحق كمية كبيرة من الأزوت وعلى طول فترة الزراعة يستحق كمية كبيرة من البوتاس وكمية كبيرة من العناصر الأحادية.

كيفاش تعرف الي انت قصرت و ماعطيتش الطماطم برشة سماد؟

كان ماعطيتش الطماطم كميات كافية من السماد, الغرسة بش تصير حساسة للأمراض و زادا غلتها بش تكون ناقصة يعني كمية الإنتاج بش تكون صغيرة.

كان لاحضت الي كعبة الطماطم بدلت تتاكل في الطرف و فيها بقعة كبيرة كحلة, هاكا يعني الي الغرسة ناقصة سماد خاصة كالسيوم.

كيفاش تصير عملية التسميد للطماطم؟

- أولا تحضر الأرض قبل الزراعة خاصة كان الأرض الي بش تغرس فيها كانت بور, العملية هاذي عامة تصير في الخريف بعد ماتقلع الحشيش و تحمر التربة وتسمد الأرض بمعدل 1كغ على المتر مربع. هوني من المستحسن الكومبوست يكون كومبوست مضغوط بش عملية تحرير المواد المعدنية والعضوية تأخذ وقتها.

- ثانيا تسمد وقت تحويل الشتلات في الأرض هوني لازم تخلط في الحفرة الي بش تغرس فيها 20 بالمئة كومبوست والباقي تراب. في حالة ماعملتش التسميد الي قبل الغرس, هوني لازمك تزيد في الكمية 35 بالمئة كومبوست والباقي تراب.

- ثالثا خلال فترة الزراعة، تنجم تسقي بتاي الكومبوست المحلول في الماء مرة في الشهر والا تسقي بسماد الحريقة