إتعرف على الكومبوست

الكومبوست هو سماد عضوي فيه برشا دبال (بقايا نباتات و حيوانات متفتة) الي يُعدِل الأرض بطريقة عضوية عل وقت طويل و يُحٓسِن الخصائص الفيزيائية للتربة (كيفما: قوام التربة، هيكل التربة، لون التربة، طبقات التربة، تناسق مكونات التربة و كثافة التربة) و الخصائص الكيميائية (كيفما: قُدرة تبادل الإيونات الموجبة و إلا قدرة تبادل الكاتيونات، حموضة التربة pH) و الخصائص البيولوجية للتربة (كيفما: نوع الكائنات الحية الدقيقة، إذا كانت التربة غَنية و ألا فقيرة من الكائنات الحية الدقيقة).

الكومبوست نتحصلو عليه بعد تفتُت مُخلفات عُضوية.

كيفاش تَتفَتت المخلفات العضوية؟

المخلفات العضوية تَتَفتت عل 4 مراحل:

1-المرحلة المتوسطية: في المرحلة هاذي فما كائنات حية دقيقة اسمهم كائنات حية دقيقة مُتوَسطيٓة يبداو خدمتهم الي هي تفتيت المخلفات العضوية لِين توصل درجة الحرارة 40°مئوية 2-المرحلة الحرارية: الكائنات الحية الدقيقة الحرارية يعوْضُو الكائنات الحية الدقيقة المتوسطية في الخدمة لين توصل درجة الحرارة 70°مئوية 3-مرحلة التبريد: في المرحلة هاذي الكومبوست يبدى يبرد بالشوية بالشوية حتى تصير درجة الحرارة مناسبة للكائنات الحية الدقيقة المتوسطية و الفطريات 4-مرحلة النضج: درجة الحرارة في المرحلة هاذي تحت 30° مئوية و المواد العضوية تتفتت و تولي عناصر غِذائية و الضاهرة هاذي نسميوها "التمعدن" و يصير عندنا كومبوست ذات جودة. والمقصود من كومبوست ذات جودة هو كومبوست مفيهش زِرٓاعة (بذور) أو اي أجزاء نباتية الي تنجم تِنبت (كيفما العروق...) و نسبة الحجر في وسط الكومبوست ماتفوتش 5% من وزن المادة الجافة و كُبر الحجرة ماتفوتش 5مم. لازم الكومبوست فيه عل الاقل 20% مواد عضوية من وزن المادة الجافة. و نقولو الكومبوست نظيف وقت نسبة السموم ماتفوتش 0.5% من وزن المادة الجافة.

الكومبوست بالأساس ينفع التربة مثال: - يُحسن مسامية التراب - يزيد قدرة التربة الرملية بالاحتفاظ بالماء - مايخليش الأرض تتعرى وقت الريح و المطر - يخلي هيكل التربة مُستقر - ينظم نَسق إنتشار العناصر المعدنية و يخليهم متوازنين في الأرض - يزيد في مُحافظة الأرض على الإِيونات المعدنية و العضوية - يزيد من قدرة تبادل الكاتيونات في التربة - مايخليش الأرض تولي حامضة - يضمن تمعدن الأزوت و يحرر الفوسفور و الكبريت بش تنجم تتغذى منهم النبتة